Rev 7 | MMX | STEP | Melemu at nai aga ven lavanuet lubungangelo diga tu ro at lavanuet mesuluk at na lavatbung menemen, digam tebeng alis lavanuet laramera manman at lavatbung menemen kusu lamanman noxot mas lavatbung menemen kopla laras kopla larauna.

Revelation of John 7

Limixin Boro Israel (144,000)

1 Melemu at nai aga ven lavanuet lubungangelo diga tu ro at lavanuet mesuluk at na lavatbung menemen, digam tebeng alis lavanuet laramera manman at lavatbung menemen kusu lamanman noxot mas lavatbung menemen kopla laras kopla larauna. 2 La nia aga ven manga lara laangelo ga vas su boro at loxot, laxangking it los su e. Neni gap kip lavanga loklok katling at ne Moroa i rooro amisik. La ni gap kup mi laxaka silok ti mo lavanuet lubungangelo diga lok ka lololos kusu ri lok kapmek lavatkangka eburu mi laras. 3 La ni ga lok, “Nemen mita lok kapmek lavatkangka kopla laras kopla larauna, ise do mana lok li loklok katling to at levenmang at lavasaxaruki at ne Moroa.” 4 La diga tong i ria do leexes atdi axap mo limixin diga ruuna loklok katling at ne Moroa ro at levenmang atdi ga epovo at legesa sangaun kobot mi lavanuet sangaun mi lavanuet larabin sangsangaun kobot (144,000). Nedi at lasangaun mi legepura larabibinat me Israel.

5 Lasangaun mi legepura larabin sangsangaun kobot (12,000) diga lok katling di at libibinat at ne Juda; lasangaun mi legepura larabin sangsangaun kobot (12,000) at libibinat at ne Ruben; lasangaun mi legepura larabin sangsangaun kobot (12,000) at libibinat at ne Gat. 6 Lasangaun mi legepura larabin sangsangaun kobot (12,000) at libibinat at ne Asa; lasangaun mi legepura larabin sangsangaun kobot (12,000) at libibinat at ne Napitali; lasangaun mi legepura larabin sangsangaun kobot (12,000) at libibinat at ne Manase. 7 Lasangaun mi legepura larabin sangsangaun kobot (12,000) at libibinat at ne Simion; lasangaun mi legepura larabin sangsangaun kobot (12,000) at libibinat at ne Levi; lasangaun mi legepura larabin sangsangaun kobot (12,000) at libibinat at ne Isaka. 8 Lasangaun mi legepura larabin sangsangaun kobot (12,000) at libibinat at ne Sebulon, lasangaun mi legepura larabin sangsangaun kobot (12,000) at libibinat at ne Josep, la lasangaun mi legepura larabin sangsangaun kobot (12,000) at libibinat at ne Beniamin.

Buaang Limixin Diga Sigaara Levempanga Singsiga Bunbun

9 Melemu at nai aga ven buaang nedi limixin, ixo epovo do tara na us nedi. Nedi boro at lengkot axap at na lavatbung menemen, la at larabibinat axap la at levenasen bantuxu axap la boro at lempapaase axap, diga tu ro melamgo at loxonin orong la to melamgo bok at Lanasip. Diga sigaara mi levempanga singsiga bunbun. La digam tebeng lempavaxan bisi at levengkikngen di. 10 La digap kup lolos keretna,

“Loklox arooro boro at ne Moroa, mo it kis at loxonin orong teren la boro bok at Lanasip.” ^a

11 La mo lubungangelo axap diga tu kangkan loxonin orong la nedi legepu sangaun mi lavanuet loxongkulao amgomgo eburu mi lavanuet levempanga rooro, diga xis tiktikbu mi lempatgulom atdi ro melamgo at loxonin orong la diga lotu parap ne Moroa. 12 Diga lok keretna,

“Tuturun pam. Loklox anarong, la leemi asu, lakleklen, luvukat, la loklok ngangao, mi lololos ti ne Moroa atdik amisik la kopmen taxavaxap teren. Tuturun tinotno.”
13 La lara atnedi loxongkulao amgomgo ga sue ia, “Nege di na limixin di sigaara mi levesingsiga bunbun, la di laa rinotno meva?”

14 La aga lok tin keretna, “Leeme Silok. Axoklen i, nenu uklen i.”

La ni ga lok tia, “Nedi na limixin digap tavasu basinge levenmaares lolos; la dira gos pam levesingsigaara atdi mi lada at Lanasip la dira lox anbun axap pam i. 15 Kuren la di tu amisik to melamgo at loxonin orong at ne Moroa la di gugu amisik tin at lengkangking mi lengkanimin keneng ap mo loogu laplavang teren; la ne Moroa, mo it kis at nom loxonin orong, neni naba lok tatao avukat di ro xeneng at loogu ren. 16 Di noxo roxo bok ba, la di noxo minu bok ba; la laxangking noxo soosoo lolos bok ba mavana atdi la liplivi at laxangking noxo sep polo ridi, 17 mila Lanasip mo ik lok kantubu at loxonin orong, neni naba lok tatao di kerekngan laradi ik lok tatao levesipsip teren, la neni ba sat kaka nedi uto at levendan tooro i puvut su la ne Moroa naba lok kepe axap levengkamkabili dan basinge lengkatli atnedi.”